中環出更：九巴「金公主」 入行當自己男人
時代進步咗，女性地位雖比以前高，但目前社會上成功女性一路走來都遭遇唔少挫折，能夠撐起半邊天都各自有一套職場生存之道。尋日係三．八婦女節，卓妮喺沙田馬場見到事業型女強人、「九巴金公主」伍穎梅，講起佢剛投入九巴工作時，身邊九成都係男同事，感覺女士升職機會較少，返工時只好「當自己係男人」，以中性打扮或穿着套裝示人，近年才打扮得靚啲。
同樣入馬場消遣嘅美昌集團副總裁顏吳餘英亦有類似經歷，佢出身工業界，行內至今都係男多女少。以前佢剛出來工作，感受最深就係女士講嘢經常冇人理會，在內地應酬時更加明顯，又指男士應酬不時兩杯酒落肚就暢所欲言，但一有女士在場就會變得好嚴肅，所以佢有時都會揀啱活動先至出席。
劉怡翔夫婦靠游水繫感情
另一邊廂，政府尋日亦喺政府總部舉行婦女節酒會，婦女事務委員會主席劉靳麗娟同擔任財經事務及庫務局副局長嘅丈夫劉怡翔一齊出席。劉太話，雖然佢同丈夫平時因為各有各忙好少見面，但原來佢哋每晚都會一齊去馬會游水，喺做運動期間順便聯繫感情。佢話唔少事業女性要同時兼顧家庭確係唔容易，建議夫婦之間要互相體諒，明白彼此需要。
勞工及福利局局長張建宗（小肥張）就趁呢日賣口乖，大讚太太將屋企打理得井井有條，令佢可以安枕無憂繼續工作，例如幾年前佢哋要搬屋，張太知道小肥張心繫工作，於是叫佢繼續返工唔好理屋企事。民政事務局副局長許曉暉就話，雖然自己平日好少時間留喺屋企，但佢都好珍惜同丈夫相處嘅時間。
卓妮