前朝貪曾發夢都話要打造紐倫港，仲話金融業可以養活一千萬人，結果累到香港獨沽金融一瓣，產業結構過分單調。不過唔使擔心，現屆政府咪話要「做多做闊」嘅，家陣終於成功在望，而且呢門產業真係可以養活好多基層市民添。咩產業咁巴閉？之唔係「水貨產業」囉。
唔係講笑o架。北京兩會今日召開，對於香港人嚟講，重頭戲當然係檢討個人遊啦。港府高官近排連連放風聲話有意收緊「一簽多行」，包括將「一簽多行」改為「一簽若干行」，既然講得出口，相信已經同中央打過招呼，雙方有晒默契，睇嚟都勢在必行咯。
可能有人會問，既然收緊「一簽多行」，內地水貨客冇咁容易落嚟，仲點振興「水貨產業」呀？即係咁，內地水貨客少咗，唔代表水貨活動少咗，甚至唔代表水貨客少咗，只不過係水貨客全部變成香港人咁解啫。嗱，內地官媒報道，深圳海關過去四年截獲嘅三萬幾個職業水貨客當中，六成以上係香港人，因走私貨物被定罪嘅，港人更加佔咗八成。一旦內地水貨客絕迹咯喎，本地薑梗係極速填補「市場空缺」喇。
唔講唔知，走水貨真係幾好搵o架。有人係咁講嘅，一日走三至四轉就可以穩袋一張金牛，不知幾和味。仲有喎，幾時返工，幾時收工，走幾多轉，自己做老闆，話晒事。你話嘞，今時今日呢啲咁筍嘅工去邊度搵呀。早排春節期間食肆咪嗌晒救命話請唔到人，搞到要以高薪「炒散」嘅，據講好多人就係去咗走水貨嘞。
所以話啫，蝕本生意冇人做，殺頭生意有人做，水貨行業產業鏈咁大，利錢咁豐厚，連最下游嘅都搵到兩餐，況且捉到最多只係罰吓錢，又唔使真係殺頭，梗係趨之若鶩喇。以為取消一簽多行就可以杜絕水貨活動，講吓就得！
仲有唔好唔記得，來港搶貨嘅除咗水貨客，更多嘅其實係買嚟自用嘅內地客。鬼咩，內地除咗騙子之外，乜嘢都有假嘅，搞到連廁所板同大米都要山長水遠去日本搶，最頂癮嘅係，當發現原來買番國產貨時，唔少人居然認為話晒都係賣畀外國人，質量始終有保證，十足崇洋媚外。所以話，除非香港全面封關，唔畀內地客入境，又或者內地唔再生產假冒偽劣貨品，乜都搶一餐嘅亂象都幾難改善，水貨活動都幾難杜絕。
一句講晒，收緊一簽多行嘅結果，就係自己水貨自己走，肥水不流深圳田，你話嘞，香港係咪想唔發展水貨產業都幾難呀。啲激進組織最鍾意講「本土優先」吖嘛，依家實牙實齒促進本土水貨經濟，唔該咪再借頭借路搞搞震啦！