行政署早前發出題為「用詞正確」嘅內部通告，要求各決策局同部門今後唔應該再使用「中港關係」一詞，應採用「內地與香港的關係」，當時有親中人士分析，呢個舉動同近日愈益炒作嘅「港獨」問題有關，不過勢估唔到連理應政治正確嘅全國政協常委陳永棋（棋哥）都中招。棋哥尋日講起元朗反水貨客行動時，最少兩次以「中港關係」形容問題，唔見得有任何避忌或問題，唔知棋哥無醒起講「中港關係」可能會被人抽秤，事後會否有手尾要跟呢？
