講到新界東北發展計劃，每次都相當惹火，最近一次就喺上月三日，城市規劃委員會（下稱城規會）原本舉行新界東北發展計劃最後一場申述會，因當日有反新界東北團體質疑安排不公，雙方更爆發小衝突，需要即時停止會議，城規會事後決定「擇日重賽」，揀咗尋日同明日（4日）加開兩日嘅申述會等村民表達意見，點知城規會會議尋日朝早九點「開波」，等咗成一個鐘直至早上十點，申述團體代表依然一個人影都冇，城規會主席周達明只可以宣布流會收場。
古洞北發展關注組主席李肇華接受查詢時辯稱，估計東北規劃組成員尋日朝早應該有其他緊要事忙緊，所以未能出席。佢又聲稱，佢哋會把握明日最後一場申述會表達意見。話時話如無意外，城規會明日係最後一日講新界東北嘅意見，申述團體代表一旦再次「甩底」，就係自己嘅問題，無得再搵藉口辯解嘞。