政情：鄭志剛藝術修養高
新世界發展有限公司尋日宣布，現任新世界發展執行董事兼聯席總經理鄭志剛（Adrian）將出任新世界發展執行副主席，於下月一日生效。原來鄭志剛除咗識做生意，佢喺藝術方面亦好有修養，Adrian於○八年創立自己嘅藝術商場品牌K11，於商場內舉辦過多個大型藝術展覽。
涉足世界多地「藝壇」
根據經濟學人調查，Adrian係去年度十大國際藝術人物之一，可見佢年紀輕輕，只有三十四歲，係國際藝壇方面已經薄有名氣。
Adrian公職有好多方面，其中於藝術文化方面涉足世界多個地方，除咗於香港係西九文化區董事局成員，仲係中國國家博物館基金會理事，亦係法國龐比度藝術中心嘅國際收藏委員會委員，可見佢好想喺文化藝術方面出一分力，Adrian希望藉住佢做嘅工作，可以提高中國藝術於國際舞台上地位。