政情：學生前線率先玩完
隨着佔領運動去年底曲終人散，「雙學」內部問題逐步浮現，其中專上學生聯會（學聯）秘書長周永康領導嘅學聯被指立立亂，繼港大學生會喺情人節公投通過同學聯「分手」，八大院校都醞釀「退聯」跳船，排住隊搞「退聯」公投；學民思潮就面對青黃不接，除咗黃之鋒長年留任發言人外，未見有新血跑出；至於不滿「雙學」於佔領行動唔夠激而催生成立嘅「學生前線」，尋日突然宣布摺埋，前後成立只有短短三個月，似乎學運勢力有瀕臨瓦解迹象。
院校紛退聯公投
港大學生會喺情人節同學聯「分手」，一石激起千重浪，多間院校陸續成立「退聯」關注組，紛紛質疑學聯透明度低同帳目混亂，其中中大本土學社同理大學生會退聯關注組將於本周收集學生聯署，發動「退聯」公投，暫未見學聯有乜招數可以令「退聯」一事不再擴散。
學民疑後繼無人
相比學聯受到「退聯」跳船一事困擾，學民嘅情況亦唔好得幾多，曾經做過學民發言人嘅周庭同劉貳龍，早前分別以個人理由辭去發言人職務，連另外一名發言人黎汶洛都講明，嚟緊會專注學業唔會競逐連任，暫時只剩下黃之鋒成為學民發言人，因此有傳有人曾游說周庭同劉貳龍重出江湖擔任發言人，再加上有成員願意頂上出任發言人，就可以形成「兩舊兩新」帶領組織發展，但周庭接受查詢時斬釘截鐵表明無意「出山」做番發言人，令人懷疑學民係咪後繼無人。
除咗「雙學」各自問題多多，人稱「四眼哥哥」嘅鄭錦滿於佔領行動後期成立嘅「學生前線」更提早一步摺埋。「學生前線」尋日於社交網站Facebook嘅專頁宣布即時解散，而專頁亦即將會關閉，表明原因係話身兼抗爭者同學生於身份同時間上諸多不便，無法兼顧各方問題，所以決定解散，但實際原因係咪號召力不足，答案相信不言而喻。