中環出更：新民黨有靚女高材生加盟
新民黨向來對尖子情有獨鍾，最新有靚女劍橋高材生加盟，佢就係社區發展主任王政芝（Gigi），佢本身樣貌標致，笑容甜美，而且學歷有番咁上下，先喺倫敦帝國學院讀生物醫學工程，之後再到劍橋攻讀生物科學碩士，現時於投資銀行中任職，有傳Gigi係新民黨秘密武器，用作「替補」灣仔大坑選區嘅區議員黃楚峰位置；至於該黨另一成員、律師江玉歡（Doreen）則於去年反佔中時有一定知名度，據聞佢現時於東區積極備戰，究竟Gigi同Doreen能否於年底區選一炮而紅？
葉劉談平權蝦碌
另外，新民黨主席葉劉淑儀尋日於社交網站分享各國的婦權運動發展歷史，特別提到中國，「1947年立國時實行平權了」，就係呢一句內容惹來網民熱烈討論，懷疑葉太連中國建國日期都搞錯，有網民更將之同葉太於年初二被麒麟撞飛拉上關係，笑言唔知葉太係咪被麒麟撞飛後計錯數。
不過晚上時分，有人發現「立國時」三個字已被刪除。葉太接受查詢時重申，個人曾翻查不少網站，發現中國於1947年時已實行平權，即是女性人民同樣享有投票權及被選權等。
卓妮