中環出更：激瘦貪湯鬼祟赴京頭耷耷
全國「兩會」政協會議於北京開幕，前年撈咗個全國政協銜頭嘅「貪湯」前廉政專員湯顯明，瘦咗個碼都繼續赴京，今年改乘的士停喺幾架私家車嘅後面，然後鬼祟匿埋喺人群中，頭耷耷步入機場貴賓室，未有回應有冇帶茅台酒去北京。貪湯抵達北京後，被傳媒問及廉署會否對佢起訴時，更厚顏稱從佢角度嚟講，事情已完結。貪湯扮冇事係一回事，但貪湯案全城關注，如果冇一個清晰交代，市民唔會咁易畀佢博大霧「甩身」。
尋日早上約十時半左右，貪湯鬼祟現身機場貴賓室外，現場只見貪湯一身黑色西裝襯行山鞋、戴銀色項鏈，右手持啡色手提袋，步入貴賓室時一度頭耷耷，當問及有冇帶茅台酒去北京時，貪湯尷尬一笑，頭耷耷不發一言，冇作任何回應。
內地打貪 雙貪難安枕
除咗貪湯捲入貪腐醜聞仍然逍遙法外，「貪曾」前特首曾蔭權爵士被揭發「歎盡省港澳、貪盡海陸空」貪腐醜聞長達三年，至今仍未「落鑊」，撞正依家內地打擊貪腐雷厲風行，呢對「絕代雙貪」似乎有得震無得瞓嘞。
另外，身兼政協委員嘅立法會議員張華峰及陳婉嫻、馬會大董李家祥、中央政策組前首席顧問劉兆佳等，亦前後腳現身搭飛機赴京，其中張華峰透露，在京期間將拜訪內地財金官員，討論深化滬港通，並爭取深港通盡快落實；陳婉嫻則話，於北京將會提到限制「一簽多行」嘅問題，又唔擔心會影響內地與香港關係。
卓妮