政情：建制兩女將謀法界議席
去年歷時七十九日嘅佔領行動，終由警方清場落幕。唔少人話佔領行動衝擊法治，好似有泛民中人曾經講過，唔遵守法庭禁制令唔算違反法治，惹來唔少非議，有人更將矛頭直指法律界議員郭榮鏗捍衞法治不力，令建制派對法律界議席蠢蠢欲動，務求一舉攻陷呢個泛民一直盤據嘅議席，當中有傳法律界兩名女將，同樣出身港大法律系嘅律師陳曼琪同江玉歡有意左右夾擊郭榮鏗，建制泛民喺法律界相信好戲連場。
建制派過去多年都無法喺法律界功能界別議席攞到零的突破，適逢去年有佔領行動爆發，有分析指社會對法治有另一體會，或者係建制派喺法律界議席，挑戰泛民代表最大機會成功嘅一次。
陳曼琪申禁制令上位
據聞建制派法律界疑似候選人，其中一人係中小型律師協會創會會長陳曼琪，佢最為人熟悉係於反佔中期間，代表潮聯小巴向法庭入稟申請旺角禁制令一炮而紅，有傳佢有意喺法律界更上一層樓。
早前有消息盛傳，陳曼琪有機會喺一六年立法會九龍東地區直選，接替事先張揚會退下火線嘅黨友陳鑑林，不過最近多個消息證實，佢已退出九東嘅遴選，疊埋心水專注法律界工作，包括前日以協會名義力撐政改「袋住先」，令人懷疑佢於政界已轉換跑道，一心一意喺法律界殺出一條血路。
江玉歡發起默站行動
建制派另一挑戰法律界可能人選係江玉歡。據聞江玉歡當年同陳曼琪係港大法律系同學，本身係國際律師樓禮德齊伯禮律師行合夥人，亦係新民黨成員，去年有隨黨赴京訪問，仲喺佔領行動期間發起法律界默站行動，並於接受傳媒訪問時批評法治被動搖。
我哋問過陳曼琪同江玉歡參選法律界議席嘅意向，前者話會繼續服務法律界，強調唔係為咗議席而工作，後者則話依家講選唔選係言之尚早，現時會多啲關注政制發展等事宜。
現任法律界議員郭榮鏗接受查詢時話，有建制派挑戰係好事，歡迎競爭，又再三強調於佔領期間，已講明要遵守法庭禁制令。究竟佔領行動會否左右法律界中人對業界議席代表嘅要求，時間將可證明一切。