中環出更：陳「年」經驗：春假後工廠缺人
農曆新年假期結束，又係內地工廠員工嘅轉職潮，唔少老闆都各出奇謀留住啲員工。卓妮尋日喺沙田馬場見到「家電大王」、德國寶董事長陳國民（Edward），佢話以前最惡劣嘅時候，試過新年後返回內地工廠，竟然得番一半員工返工，不過近年情況稍有好轉，約有七、八成員工返工。
對於留住啲內地職員嘅招數，陳國民坦言非常實際，而且冇咩秘訣可言，就係人工高、福利好同工作環境佳，事關每逢農曆新年後，周邊其他廠房都有缺人情況，有機會爭人用。因此，為咗避免啲員工流失太多，佢哋會因應唔同員工嘅需要而彈性處理。
李鋈麟：增供應紓樓荒
不過，又唔係所有廠房都可以於春節期間放大假，理文化工首席執行官李文恩（Norman）話，做化工全年無休，因為化工廠尤其生產清潔劑等液體的工序或運作，一旦停頓會有危險，所以大年初一至三都需要有員工返工，而根據內地相關法例，如果員工呢幾日返工嘅話，僱主要支付三倍人工，加上佢哋分別位於江西同江蘇嘅廠房習慣聘請當地人，員工家人亦居於當地，因此唔需要特登放長假老遠回鄉過年。
東華三院副主席李鋈麟亦有現身馬場，講起金融管理局突然出招收緊細價樓按揭成數，佢認為有機會令租盤更緊張，至於係咪令市民更難上車，佢就覺得同之前分別不大。佢又提及，中國人傳統覺得要有瓦遮頭先至安穩，要解決呢個問題除咗增加供應，其他辦法都成效不大。
卓妮