香港社會泛政治化，爭拗不斷，搞到一事無成，創科局一再難產，就係最典型例子嘞。相對於鄰近地區科技產業發展一日千里，香港原地踏步，都咪話唔心噏，有人諷刺創科局已經淪為「創傷局」，真係一啲都冇講錯o架。
呢，喺反對派拉布之下，創科局已經兩度難產，港府聲稱會再接再厲，喺今個月中第三度闖關喎。不過咁，咪話功夫茶潑冷水，喺反對派全面不合作之下，創科局想過關仲難過登天，無論港府點樣再接再厲，點樣再度闖關，睇嚟都係嘥氣嘅喇。
家陣嘅問題係，時間唔等人，再拖落去始終唔係辦法o架，到底有咩計呢？有立法會議員出席東網電視時事評論節目時建議，政府闖關前應盡量游說反對派議員，爭取佢哋支持喎。
即係咁，呢個建議無疑用心良苦，可惜秀才遇着兵，有理說不清，反對派既然立定心腸要癱瘓施政，就算你有三寸不爛之舌，都冇可能令頑石點頭o架。其實，成立創科局唔止有實際需要，亦得多數民意支持，更加係業界嘅共識添，結果反對派咪一樣阻撓。最搞笑嘅係，代表業界嘅反對派議員多次呼籲同僚放行，結果一樣冇面畀，如果港府以為游說幾句就可以令佢哋回心轉意，咁就太傻太天真嘞。
話時話，有啲香港人相信「high tech揩嘢，low tech撈嘢」，一向唔重視科研創新，加上香港獨沽金融地產，產業結構單一，搞到競爭力每況愈下，畀新加坡等對手愈拋愈遠，依家至計劃成立創科局，起步已經太遲，點知仲遇着政客玩嘢，搞到舉步維艱，講起真係可悲。早前有高官形容立會否決創科局撥款，係香港送畀競爭對手嘅「情人節」大禮，照依家嘅形勢，分分鐘送埋聖誕禮物都似。
正所謂，一葉知秋，創科局一波三折，只係政治紛亂不休、行政立法惡鬥不止嘅縮影咋。大家有眼見，港府動輒得咎，無論制訂咩政策，推行咩措施，即使關乎民生嘅議題，反對派一於少理，照阻可也。難為班政客平時大義凜然，擺出急民所急咁款，真係笑死人。所以話，行政立法惡鬥嘅死結一日唔解開，香港都唔會有運行。
諗落真係悲哀，周邊地區全心全意謀發展，香港就一心一意搞內鬥，唔通真係氣數已盡，注定變番一個小漁村？