政情：傍住吳得掂 楊潤雄迷惘
一生人流流長，面對人生抉擇時總會有迷惘嘅時候，不過，教育局副局長楊潤雄（Kevin）迷惘嘅時間特別多。佢自爆每日返辦公室，一打開報紙，發覺自己無端端成為被罵對象，唔知道點樣先可以做好件事，就會覺得好迷惘喎！
常成為被罵對象
Kevin尋日擔任北區優秀學生選舉頒獎禮嘅主禮嘉賓，佢致詞時鼓勵一班學生選科時要朝住自己嘅目標同夢想進發，咁好多疑惑就會迎刃而解。Kevin講講吓，突然感懷身世，話自己成日都會覺得好迷惘，事關成日無端端被傳媒罵，覺得好迷惘。查實Kevin迷惘嘅原因好簡單，因為佢傍住個怕孭鑊又唔得掂嘅上司教育局局長吳克儉（吳得掂）囉。吳得掂逢親有棘手問題就外訪或放大假避風頭，焗住要由Kevin署理埋局長嘅工作，獨自一人收拾爛攤子，梗會覺得迷惘啦！