政情：田二少前助理 一「照」泯恩仇？
新民黨立法會議員田北辰（田二少）前助理趙恩來（阿來）年前同老闆反面後，轉投敵陣工黨任社區幹事，仲明刀明槍劍指田二少喺荃灣愉景新城嘅地頭，部署年底區議會選舉上演復仇記。不過，阿來尋日突然喺社交網站上載同「世仇」嘅合照，仲留言話「不解釋！」二人笑笑口咁合照，唔通已一「照」泯恩仇？
二人笑笑口 卻否認「復合」
既然阿來不解釋，咁我哋問吓田二少所謂何事，但田二少否認「復合」，仲話尋日出席屋苑活動時原本向小朋友派糖，但阿來無緣無故「黐埋嚟」，又話要包糖、又要合照。田二少大方應承，估唔到對方將合照放上網，惹來咁多聯想。田二少仲話，對方今次要包糖，下次又唔知想要乜，但都要睇吓佢畀唔畀嘅。
不過，阿來其後喺社交網站留言，話主辦單位根本冇請田二少，但佢攞住疊利是搶主人家風頭。阿來仲補充，二人合照只係咁啱撞到，完全唔關「復合」事。前哨戰已經咁精彩，睇怕年底區選一定好戲連場。