政情：新軍掘起傳統泛民等摺
佔領行動過後，香港湧現咗一批熱衷政治嘅新青年軍，部分更表明有意參選年底區議會選舉，雖然佢哋號稱狙擊對象只係建制派，但傳統泛民主派心底裏點唔知道大家係咪真正同路人？綜合現時形勢，呢批區選生力軍大致分為三類，除咗激進網民同高學歷年輕人，據知一批同樣高學歷嘅中年專業人士都有意分一杯羹。不過，三批生力軍共通點係傾向唔相信傳統泛民，長江後浪推前浪，傳統泛民真係等摺埋。
多為高學歷專業人士
我哋之前已講過激進網民同高學歷年輕人冒起，而高學歷中年專業人士亦唔係咩新鮮概念，好似另組新法律組織「法政匯思」嘅律師任建峰就係例子之一，呢班人一般具專業背景，學歷高、辯才好，最重要係每人本身都係一條「大水喉」，絕對唔使為選舉經費煩惱，加上佢哋唔怕輸，志在參與，只係欲借區選宣揚真普選理念，就算參選擺明係倒錢落海都冇所謂，難怪無論泛民、建制都奈佢哋唔何。
是敵是友？ 考起泛民
其實傳統泛民被狙擊唔係新聞，好似人民力量早喺一一年區選就擺明「懲罰」民主黨（白鴿黨）支持政改，老鴿領導層理應早有應對方案。不過，有泛民中人反映，雖然呢批生力軍唔係明刀明槍狙擊泛民，但佢哋大多係不滿泛民作風先至行出來，冷不防佢哋喺公開場合力數傳統泛民嘅不是，泛民陣營該點樣看待，寧捱插都要力撐佢哋？抑或劃清楚河漢界，各走各路？真係考起泛民智慧，要諗計應對。
一般低知名度嘅傳統泛民區議員在公眾場合被呢批生力軍攻擊，可能影響好微，但換轉資深區議員或雙料議員，好似老鴿「AV仁」何俊仁及涂謹申、民協馮檢基等，真係乜面都冇晒。據知部分泛民政黨率先四出收風，睇吓呢批生力軍係咪必定參選，更有意整合佢哋出選意向，避免自己人打自己人。不過，傳統泛民自己都識講啦，呢批生力軍係唔滿意佢哋做唔到嘢先至出來參選，最終係咪聽佢哋支笛，相信答案不言而喻喇。