中環出更：藍爺遊舊地 憶救命恩人
車水馬龍嘅港鐵沙田站旁，有條古厝及藍氏家祠等歷史建築物並列嘅排頭村，鬧中取靜夠晒特別，一向吸引唔少遊人去尋幽訪勝。人稱「 藍爺」嘅藍氏家族第八代後人兼博愛醫院永遠顧問藍國慶，早幾日特登帶太太王雲仙（Mina）返去行吓，見到一草一木，不期然諗起童年趣事。最難忘係有次爬樹時差啲冇命，可惜已搵唔番當年嘅救命恩人。
小時候爬樹險跌死
藍爺話，小時候佢同一班小玩伴好鍾意爬樹摘生果，有次佢爬上一棵荔枝樹摘荔枝，摘得太入神成個人懸吊在半空中而不自知，搞到唔上唔落。幾名大人見狀即喺樹下打算接住佢，但未等得切大人埋位，佢就因體力不支而跌咗落嚟，最終有個好心人奮不顧身接住佢，但有心人就因此而受傷。藍爺對呢位救命恩人一直銘記於心。
排頭村咸豐年始建
講起已經百幾年歷史嘅排頭村，係由藍氏先人於清朝咸豐年間建村，雖然依家有好多外姓人遷入，但村內仍有二百多名藍氏族人。村內有間知名嘅茶餐廳及薄餅店，店主就係藍國慶嘅哥哥藍國偉。
藍爺話，由於條村老化，有唔少問題需要同政府爭取，例如爭取興建多層丁屋，以便解決村內唔夠土地起丁屋嘅問題。所以佢決定投入村內工作，年初仲當上排頭村村長添！
自細喺外國長大嘅Mina笑稱，佢結婚後先知香港唔止國際化，仲有咁傳統嘅村落，佢經常笑自己唔小心做咗村姑，依家就升呢做村長夫人，覺得好得意喎！
卓妮