財政司司長曾俊華年年估錯數，早就唔係新聞，其實佢唔止擅長估錯數，仲擅長玩數字遊戲添，朝三暮四，朝四暮三，簡直無聊到極！
話說新一份財政預算案嘅醫療衞生開支「激增」，高達四百九十億元，增幅接近兩成三，唔知仲以為鬍鬚曾呢個孤寒財主轉死性，大破慳囊，睇真啲至發現，呢啲不過係數字遊戲咋，下年度嘅醫療衞生經常開支實際僅增加一億元多啲，增幅得百分之零點八，計埋通脹因素，其實係縮水至真。
唔使問阿貴，兩條數相差咁遠，一定有蠱惑。原來港府幾年前預留五百億元推行醫療改革，點知改嚟改去得個吉，呢筆錢郁都未郁過，鬍鬚曾於是利用掩眼法，左調右調，一百億元成立基金推動公私營醫療合作，一百億元注入自願醫保嘅高風險池，一百億元用於興建私家醫院借貸同日後醫保扣稅優惠；剩低嘅兩百億元中，一百億元撥入下年度醫療衞生開支，變相谷高增幅，仲美其名話醫管局經常撥款較五年前多咗一半，你話係咪蠱惑吖？
預算案搞咁多嘢，無非想誤導市民，以為當局對醫療服務有承擔啫。正如立法會議員話齋，鬍鬚曾涼薄，醫保走數，醫療開支增幅跑輸通脹；病人權益組織就指預算案對醫療服務着墨甚少，令人失望；醫學界人士更擔心醫療改革隨時失敗收場。嗱，市民眼睛係雪亮嘅，鬍鬚曾玩數字遊戲呃神騙鬼，畀人一眼睇穿，呢啲咪叫弄巧反拙囉。
講到醫療改革，真係一匹布咁長。公營醫療體系百病叢生，事故不斷，尤其係醫管局領導無方，烏龍百出，更加備受非議。面對要求改革嘅強烈呼聲，港府一味玩拖字訣，話就話要檢討醫管局，仲成立咗個督導委員會添，點知到依家仲係無影無蹤。最好笑嘅係，當局為咗推卸醫療包袱，一時搞強制醫保，一時搞自願醫保，結果愈搞愈亂，五百億元預留款項變成百搭牌，呢度搭啲，嗰度搭啲，同推行醫療改革嘅原意背道而馳。
係人都知，隨着人口逐漸老化，醫療需求不斷增加，如果再唔改革，隨時爆煲都似。好似呢次流感高峰期咁，公立醫院急症室日日爆棚，內科病床佔用率持續高企，搞到七國咁亂。雖然話今次流感死亡率高未必同醫療質素下跌有關啫，但萬一再爆發好似沙士咁嘅疫症，以目前公立醫療超負荷嘅狀態，後果真係不堪設想o架。
老實講吖，港府財源廣進，庫房水浸，錢多到唔知點使，完全有能力增加對醫療衞生嘅承擔，弊在港產官僚涼薄，一味諗縮數，寧願做守財奴，都唔願改善醫療服務，問你服未！