政情：法籍「仁」妻煮蘿蔔糕宴客
農曆新年係中國人最重視嘅傳統節日，家庭主婦都會出力炮製美食招呼親友，而香港教育學院校長張仁良嘅法籍太太Christine都唔例外。
定情食物 冬菇炆雞
Christine三十年前嫁畀張仁良來港定居後，好努力學習中國文化、語言及廚藝。尋日教院舉行春茗，Christine就親自下廚整蘿蔔糕畀大家品嘗。張校長賣口乖話覺得好好味，叫大家客觀畀食評。見到現場個個都食到唔停得口，就知張太手勢一流啦！
操流利廣東話嘅Christine仲大爆二人嘅甜蜜往事，原來當年張仁良去法國留學，咁啱同Christine住埋同一幢學生宿舍，好快就被Christine嘅魅力吸引，仲憑一碟冬菇炆雞成功奪芳心，自此Christine就迷上中國菜，最鍾意食蒸魚、點心。咁張仁良依家有冇再整冬菇炆雞冧老婆？張仁良就話依家好少食雞，但兩公婆得閒就會去買餸玩煮飯仔，非常恩愛。