臨渴掘井，為時已晚，呢個道理連三歲細路仔都知道。疫症殺到埋身至四圍撲疫苗，同臨渴掘井一樣，隨時死得人多，唔通港產官僚咁都唔明白？
唔係講玩o架。變種流感來勢洶洶，死亡人數節節上升，截至目前已奪去近三百條人命，而且流感高峰期仲未過，死亡人數可能好快就超越沙士喇，都咪話唔得人驚。
點解疫情咁嚴峻？主要因為世衞錯判今年流感病毒類型，搞到原有嘅疫苗效用大減，而新疫苗又研製需時，所以咪倒瀉籮蟹囉。更加大鑊嘅係，香港自己唔可以生產流感疫苗，下下都要假手於人，想唔死得人多都幾難。聽講家陣淨係買到十萬劑新疫苗，距離實際需要仲有二十萬劑，萬一再爆大鑊，後果真係不堪設想。
正所謂，人不為己天誅地滅。歐美地區自身難保，淨係英國，流感死亡人數就比過去五年同期多咗超過三成，有疫苗都留畀自己用喇，邊得閒理香港吖。正如有醫學界人士話齋，美國其實已經有噴鼻流感疫苗取代打針，有助提高市民接種率，但就唔賣畀香港，你話幾無奈吖。早前有學者慨嘆，香港「要乞先有疫苗」，真係一啲都冇誇張o架。
話時話，香港乞疫苗都唔係第一次嘅喇，當年沙士係咁，伊波拉病毒係咁，家陣流感都係咁，市民一藥難求，人心惶惶，真係多得港府唔少。講到尾，求人不如求己，與其下下受制於人，望天打卦，不如自己研發好過。有業界人士就講得啱嘞，香港要發展醫療科研，唔係話冇條件，資金固然唔係問題，科研認證更加係本港嘅強項，配合內地以至東南亞嘅人才同市場，可以話係萬事俱備，只欠東風，問題係港府肯唔肯配合同支持啫。
冇計喇，港產官僚大事做唔到，小事做唔好，旨意佢哋研製疫苗，蚊都瞓蛇都死喇。即係咁，港府喺推動藥物科研方面並唔係完全交白卷，好似成立臨床試驗中心，又或者設立基金資助本地醫療研究，表面上做咗啲嘢，可惜唔係小打小鬧，就係雷大雨小，有人話本港醫藥研究水平同外國相比，連幼稚園都不如，都算羞家咯。
講多無謂，行動最實際。港府年年有餘，庫房水浸，財政儲備好快就會突破一萬億元大關，港府錢多到唔知點使，與其做守財奴，不如做啲實事，扶助醫藥科研好過啦！