對鬍鬚曾而言，香港是個真正嘅福地，財政司司長亦不折不扣是份真正嘅筍工，四百多萬元年薪，年年估錯盈餘，而且仲要錯到離晒罩，在任八年，只要在派糖上加加減減，扮演吓「狼來了」，就咁hea住「理財」，一年一年又一年……天若有眼天亦笑！
今個財政年度實質錄得九百多億元盈餘，為原預算的十倍，鬍鬚曾緊急轉軚，由「減甜」變「加甜」；除了基層的指定動作，又忽然對「中產」多了兩分憐憫，薪俸稅退稅額上限提高至二萬，比上年多一倍，而子女免稅額、差餉寬免亦大大提升、注資多個創意產業……
如此「加甜」，亦不過「派糖」三百四十億元，而庫房未來五年料依然「年年有餘」，財政儲備到二○二○年將有近一萬億元，如此歷史性新高嘅財政儲備，政府即使全無收入，這筆一萬億元嘅儲備，足夠讓政府繼續運作逾兩年；而鬍鬚曾卻憂心十年後會有財赤。呢頭派完糖，嗰頭又密謀向全港市民開刀，預告會檢討約二千二百項民生收費，未來將排住隊加價；看來，其「守財奴」性格無論外界點口誅筆伐，佢依然會守到一息尚存。
高官向來不知民間疾苦；少少加甜就以為自己係觀世音菩薩。今時今日有幾多真正「中產」如鬍鬚曾咁富貴；香港多數中產高不成低不就，上唔到車要租樓嘅更感生活壓力，為份工營營役役，說是「中產」內心有難以言詮的苦澀，而說自己是「中產」嘅鬍鬚曾，卻有王者嘅幽默！
一個「兩頭小，中間大」的橄欖型社會結構，貧富不兩極化，社會自然更趨穩定。可是，香港的「中產」，面對的是生活的疲憊與精神嘅焦慮，想要歎咖啡與睇法國電影，這路──遙不可及，盼守財奴指點方向，那無疑是漿糊鍋裏煮皮球──你說他是混蛋，他還有氣！