政情：凶！佔領頭目羊年運程「黎」緊呢年惹官非
警方即將就佔領行動展開第三波拘捕行動，雖然涉案人士最終會否被檢控仍係未知之數，但多名佔領重要人物嘅流年運程都可以批算吓。香港術數家協會術數師楊子東批算，學聯秘書長周永康、學民思潮召集人黃之鋒、人稱「搞事四人幫」成員嘅「民主阿婆」前政務司司長陳方安生、「李漢奸」民主黨創黨主席李柱銘及佔領行動幕後「黑手」兼「金主」嘅壹傳媒集團前主席黎智英（肥佬黎），今年都唔多順利，甚至官非纏身。
黃之鋒會有大衝擊
楊師傅話，黃之鋒流年行忌神運，會有大衝擊，今年農曆三月、六月、九月、十二月都容易招惹是非官非，只有農曆七月、八月略順，宜低調。至於周永康則今年會有貴人之助，但農曆七月及八月就唔多順利，或會有官非，更可能受利器所傷，而到農曆九月最運滯，將經歷大是大非大反覆，一連三個月唔係咁容易度過。
同樣行忌神運嘅仲有民主阿婆同李漢奸，楊師傅預測民主阿婆上半年平凡，但立秋後就小人是非不絕，農曆九月最不利，該月份更人事複雜有爭執，處事卻「雷聲大雨點小」，總結全年無寸進。無他嘅，民主阿婆嘅政治能量及影響力已近乎零，出來說三道四都未必有人理佢啦。李漢奸就流年與大運對沖，多勞少成，上半年不吉利，農曆九月特別多是非小人，會有驚險喎！
至於在佔領行動期間經常到金鐘佔領區「皇座」扮指揮嘅肥佬黎，早前已被警方預約拘捕及拒保候查。楊師傅話，肥佬黎立秋後運勢弱，容易招惹官非，農曆九月最反覆，七、八月健康差，本來大運合流年吉昌，但六十至六十九歲期間大運與命格相沖，故羊年吉凶參半。不過，都係嗰句，八字命理嘅嘢，信不信由你。