中環出更：阿蘇話「美食車」唔關佢事？
現屆政府官員有幾「合拍」？昨就有個最佳例子。話說財政司司長曾俊華（鬍鬚曾）新一份財政預算案，其中一個較受公眾關注係引入外地流行嘅「美食車」，佢尋日落立法會解釋美食車政策細節，話初步建議由商務及經濟發展局（商經局）負責。點知呢個時候，工聯會陳婉嫻突然踢爆，商經局局長蘇錦樑（Greg蘇）前日話唔關佢事喎！
嫻姐踢爆 商經局急補鑊
鬍鬚曾聽到嫻姐咁講，當堂O晒嘴，霎時間都唔識點回應好。咁到底應該咩人負責呢？經過我哋四出追查後，終於發現呢單嘢涉及兩個政策局，就係食物及衞生局負責發牌，但推廣同發展就由商經局負責。既然係咁，咁點解Greg蘇咁樣答嫻姐？相信得兩個答案可以解釋，一個係Greg蘇根本唔知做緊乜，一係佢推莊唔想做。
直到尋晚，商經局發言人終於回覆補飛，話預算案提出研究引入外地流行嘅美食車，「商經局將聯同有關部門進行研究，以期待把香港的特色美食更廣泛向旅客推介。」個回覆算係直接承認責任，似係焗住要做。不過，回覆無解釋點解Greg蘇要同嫻姐講唔關佢事，如果一日唔解釋清楚，睇怕嫻姐唔會咁易放過佢。
卓妮