財政司司長曾俊華尋日發表新一份財政預算案，今年庫房大豐收，佢居然交出一份毫無遠景、平平無奇嘅行貨，真係想唔認無能都唔得，唔怪得又畀人掟嘢喇！
係咁嘅，鬍鬚曾喺立法會宣讀預算案，由於內容乏善足陳，欠缺驚喜，成班議員好似被人催眠一樣，昏昏欲睡，點知當佢講到全民退休保障計劃時，有議員突然起身高叫落實全民退保，有議員更加向佢擲出「全民退保，還富於民」嘅示威牌，搞到場面一片混亂，示威議員最後被驅逐離場，呢段小插曲至畫上句號，事後鬍鬚曾仲懶咁幽默講咗句英文添。
即係咁，議員趁預算案發難，無疑係有做騷成分，不過今次亦唔怪得晒佢哋，鬍鬚曾嚴重估錯數，預算案又無交代幾時落實全民退保，佛都有火喇。嗱，佢一味重彈預留五百億元嘅舊調，話扶貧委員會已經成立小組，今年下半年將展開諮詢喎。咁即係玩拖字訣啫，全民退保諮詢復諮詢，研究再研究，港府究竟仲要拖到幾時吖？
話時話，全民退保前後已經講咗十幾年，由回歸前講到回歸後，由董建華年代講到現屆政府，學者周永新嘅研究報告都出爐超過半年喇，依家仲話下半年至展開諮詢，簡直係侮辱市民智慧。其實，鬍鬚曾如果真係做守財奴做上癮，唔想推動全民退保，咪開誠布公囉，唔使閃閃縮縮。佢話喎，根據唔少國家嘅經驗，隨住人口老化，受養人口增加和就業人口減少，「隨付隨支」嘅退休保障安排最終難以維持，社會要認真考慮。
鬼唔知阿媽係女人咩，歐洲福利國家嘅問題係人都睇到，香港嘅情況同歐洲根本唔可以相提並論。好簡單，如果香港擁有完善退休保障制度，市民自然對未來有信心，就算全民退保真係入不敷支，到時咪研究開徵新稅囉，只要合理，市民唔會斷然反對嘅。相反，港府現時乜都唔做，仲要重提開徵銷售稅，梗係畀人鬧爆喇！
問心嗰句，港府家陣肥到連襪都着唔落，二○二○年嘅儲備仲估計高達九千四百億元添，如果咁都唔肯推動全民退保，萬一將來庫房無咁好景，就更加唔使旨意喇。
一句講晒，落實全民退保既係市民願望，亦係政府責任，唔好耍太極嘞。咪話功夫茶唔提醒，香港愈來愈政治化，示威人士愈來愈激進，鬍鬚曾繼續做孤寒財爺，小心又中「流蛋」吖！