民建聯（民記）喺一二年立法會選舉，由原本十個議席增加至十三席，其中新界西嘅配票策略成功，三張名單全部當選。最近有傳政府打算微調明年立法會選舉議席數目，港島區由七席減至六席，九龍西就由五席增至六席，據聞民記諗住喺新界西同九龍西博到盡。不過，佢哋最新嘅選舉部署能否成功都好難講，仲分分鐘連累其他建制派添！
聽聞民記最新嘅選舉部署，新界西仍然由譚耀宗（譚Sir）、梁志祥同陳恒鑌（Ben）領軍，但就由三條隊縮減至兩條隊，一條隊改由阿Ben排第一，譚Sir排第二，另外梁志祥一條隊。不過，譚Sir在力保阿Ben同自己嘅議席下，可能吸票吸過龍，連累同屬新界西嘅工聯會麥美娟、新民黨田北辰等建制派。
九龍西方面，民記蔣麗芸日前已率先表態，如該選區增議席嘅消息屬實，會積極考慮派黨內新人競逐，佢就排名單第一。呢個安排對民記嚟講係合理，仲可以提攜黨內年輕一輩上位，但咁做對同屬九龍西嘅梁美芬就非常不利，而一直希望殺入該區嘅工聯會更加無望嘞。睇嚟建制派內部未來淨係爭出選已經好戲連場。