雖然電子文件普及化，但立法會秘書處每年仍要為議員影印大量文件，耗用咗唔少紙張。秘書處繼前年試行新系統，將原議案同各修正案合併，慳番唔少紙張後，嚟緊會喺下星期一起，立法會轄下所有委員會發出文件複本時，只會以電子複本方式透過內部電郵系統發畀非委員嘅議員，希望減省紙張。不過，如果議員表明想以印文本方式收取特定委員會發出嘅文件，都可以同秘書處提出。
另外，有啲文件都喺限制以外，例如載有邀請全體議員參與討論嘅委員會會議議程（唔包括討論文件）、由工務小組委員會及人事編制小組委員會發出，並分送財委會其他委員嘅討論文件副本等。其實電子化都係大勢所趨，與其只係揀部分文件用電郵傳畀議員，不如叫大家齊齊轉用平板電腦睇文件，仲可隨時上網瀏覽其他資訊，真係既環保又方便，除非有個別議員適應唔到新科技嘅啫。