政情：葉劉「麒」哥握手示好
行政會議成員兼立法會議員葉劉淑儀喺年初二於車公廟被「靈獸」麒麟「撞飛」險跌倒後，成為羊年嘅熱話。經過多日網民熱烈討論後，尋日葉劉終於有機會與麒麟「真身」、灰窰下村村民謝立元師傅會面，二人三度握手以示友好，葉劉仲笑笑口叫師傅「唔使着草」，希望對方唔好嫌棄，下年要繼續邀請佢出席儀式喎！
其實事發之後，葉劉話已經聯絡過新界鄉議局副主席張學明，希望可以搵到謝立元師傅，交代一聲自己「冇事，冇驚，係意外一場」。昨日傍晚，二人於沙田鄉事委員會會面，葉太一到場即與謝立元握手示好，並二話不說將一封五百元大利是贈予謝師傅，表示「唔好意思」。
示範「安全距離」
講番當日情況，葉太話係因為「撞到」新界鄉議局主席劉皇發後，臨時決定前往儀式，故匆忙之後冇特別安排企位。其後謝立元亦澄清當日並無任何人「企錯位」，只係儀式進行期間，嘉賓早咗少少起步，先導致發生今次事件。十幾歲開始舞麒麟嘅謝師傅仲即場示範舞麒麟時嘅「安全距離」應為三個身位，等下次大家冇預先排好企位都「知碇」企邊度喇！
至於謝師傅喺「撞飛」葉劉淑儀後換上替身一事，謝師傅解釋由於舞麒麟所花費力氣相當大，所以佢哋一早已安排好不同環節由不同隊員負責，佢同另一位同村兄弟進行完「拗門角」步驟後，立即轉由另一位麒麟隊成員、即佢嘅姪仔，進行「拜四方天地」儀式，所以佢完成自己負責嘅部分後就離開休息。
葉稱不撞不相識
尋晚葉劉前後與謝師傅握咗三次手，仲講笑話握手時感覺到對方隻手肌肉好扎實，有機會要跟師傅學武，又話自己閒時有健吓身，笑言連議員張華峰及張宇人都話自己可能會被撞得郁嘅話，佢被撞開都唔係好出奇啫。講到尾今次被「撞」都有好多人幫佢頂住，又有人扶起佢，無驚無險，算係「不撞不相識」喎！