港府冇嘢叻，最叻就係吹水唔抹嘴。呢，最近又有新搞作嘞，聲稱要借鑑新加坡嘅碧山公園，喺香港發展河道公園喎。聽落就幾吸引喇，但究竟能唔能夠成事呢？睇怕連港產官僚都答唔到你。
係咁嘅，施政報告提出親水文化及近水活動，渠務署話要研究全港二百多條河道，挑選合適河道發展為河道公園或蓄洪湖泊，畀市民玩水。呢個構思點樣嚟嘅呢？渠務官僚係咁講嘅，新加坡政府將三千米長石屎排水渠，擴闊成佔地六十二公頃嘅碧山公園，市民可於草地野餐、賞花、踩單車或跑步，落雨嘅時候又會有洪水警報提醒市民離開，認為香港可以照辦煮碗咁話。
冇錯，他山之石，可以攻玉。新加坡碧山公園規劃完善，環境優美，有行人區、兒童區、防洪區，甚至連遛狗區都有，成為當地知名綠色景點，遊客無不讚不絕口。之但係，新加坡做得到，唔等於香港做得到，唔係長他人志氣，滅自己威風，港府咁多年來提出無數宏圖大計，有邊樣可以實現吖？有邊樣唔係大隻講吖？家陣又話學人發展河道公園喎，信佢一成，雙目失明呀！
唔好講咁多，淨係發展大嶼山咋，董建華時代已經提出，一時話要打造商業購物城，一時話發展水療度假村，有人仲提議開設賭場添，依家十幾年過去嘞，十畫未有一撇。又好似發展邊境禁區咁吖，一時話開闢古蹟遊，一時又話打造旅遊購物點，結果無影無蹤，中英街到今時今日仲係人煙罕至，門庭冷落，問你服未。
如果話發展大嶼山及邊境工程浩大，阻力多多，遷延時日無可厚非，咁發展單車徑咁簡單嘅事亦係得個講字，又點解釋呢？當年黃金寶喺亞運奪金，為港爭光，港產官僚一時興起，誇下海口要將新界單車徑連貫起來，結果講完就算，單車徑仲係斷橛禾蟲。港府大事做不成，小事做不了，除咗蹉跎歲月，仲識做乜吖！
冇計嘞，議而不決，決而不行已經成為港府施政常態，今次話要借鑑新加坡發展翻版碧山公園，睇怕都係齋噏嘅咋。再講吖，家陣社會泛政治化，政客為反而反，港府施政寸步難行，就算有宏圖大計都無法落實喇，淨係睇吓創科局胎死腹中就知道港府係幾咁無奈。話時話，以前香港係亞洲四小龍之首，好多地方向香港取經，點知家陣風水輪流轉，香港掉番轉頭向人偷師，講起確實可悲。唔通香港真係氣數已盡？