政情：「橄欖」一家三村長
立法會議員陳鑑林（橄欖）尋日同傳媒團拜時就透露，女兒陳詠欣早前在無對手下，自動當選十二笏村居民代表。照咁講，連同曾出任十二笏村原居民代表及居民代表嘅橄欖太太及外父，橄欖一家前後共出過三名村長，真係夠晒威喇！
三年添五男孫
不過講到威，都唔夠佢三年添五名孫仔咁勁。橄欖笑稱，過去三年共有五個孫仔出世，仲都係男孫，最大嘅近四歲，最細嘅只有九個月大。新年期間一家大細團聚，場面認真大陣仗。橄欖長子、觀塘區議員陳俊傑就話，佢兩個囝囝一代係跟族譜改名，因此中間第二個字都一樣。
講開明年立法會選舉，橄欖去年曾提及六名區議員報名參加黨內遴選，接棒其位於九龍東地區直選議席。橄欖透露，黃大仙區議員陳曼琪已知會他退出遴選，又形容目前其餘五人是旗鼓相當，惟仍未進入大直路，預料今年中會有結果。