政情：沙田下籤 EQ歸咎本土派
沙田鄉事委員會前日為沙田求得下籤，支籤更解曰：「凡事不宜」，嚇得唔少「沙田友」個心騰騰震。
出身沙田嘅立法會議員葛珮帆（EQ）尋日出席新春團拜時，亦坦言畀支下籤嚇親，但佢就歸咎自命本土派嘅「衰人」入沙田搞事，硬闖新城市廣場騷擾遊客甚至沙田街坊喎！
本土派示威者日前以反水貨客擾亂沙田秩序為名，號召百幾人到新城市廣場抗議，EQ批評示威者不分青紅皂白係咁鬧，連商舖都要落閘唔敢開門做生意，正好反映籤文最後兩句：「無端一陣狂風雨，萬家燈熄斷管絃。」批評示威者再係咁搞風搞雨，沙田真係冇運行，遲啲商戶斷電都唔出奇咁話。