政情：撞飛葉劉 麒麟照肺？
新民黨立法會議員葉劉淑儀前日首次踏足車公廟，拍住大堆新界鄉紳為香港求籤，點知葉劉甫踏入車公廟門口石梯，即遭「靈獸」麒麟撞到彈開，聽聞事件仍有餘波。有傳當日舞隻麒麟嘅係新界原居民醒獅隊，佢哋好可能因此被鄉紳秋後算帳。
《東網》報道 網民瘋傳
車公誕年年有，但係今年特別有趣，事關葉劉被捱撞至飛彈開去嘅畫面經《東網》報道後，即被網民瘋狂轉載，成為過年期間嘅熱話。有網民質疑葉劉同鄉議局大纜都扯唔埋，何解今年無端端現身車公誕？更有熱心網民擔心麒麟突然「顯靈」，襲擊貴為行政會議成員兼立法會議員嘅葉劉，會唔會被鄉紳照肺咁照？
林偉強：唔會找晦氣
聽聞件事真係未就此打住，而且案件已驚動鄉議局上下。有傳向葉太施襲嘅麒麟因為咁而被鄉紳秋後算帳。我哋問過鄉議局副主席林偉強，佢笑笑口話，事發時佢同葉劉只係相隔幾個身位，佢趁解籤時已即刻慰問葉太傷勢。佢話鄉紳絕對唔會找班麒麟晦氣，但會設法令事件不再重演，明年舉行車公誕儀式時，會要求醒獅隊唔好趁嘉賓入場時並排表演，改為入場前、後表演助興，以免再有「襲擊案」發生。
不過，亦有口痕友質疑，係葉劉當日企得太前博上鏡惹禍。沙田鄉事委員會係車公誕搞手，前日為沙田求籤、但入廟時排位仲後過葉劉嘅沙田鄉委會副主席李志麒就向我哋證實，沙田鄉委會從來冇邀請過葉太出席，對葉太話係獲邀參加都搲晒頭。不過，新民黨去年同紮根沙田嘅公民力量結盟，同沙田關係密切咗，葉劉因此想亮吓相都理解嘅。無論如何，網民似乎對麒麟「顯靈」一事仍然好有話致，唔單止留言慰問麒麟傷勢，仲掉轉頭反譴責葉劉暴力衝擊麒麟、擾亂車公廟秩序喎！