中環出更：張華峰做脹爆財神
立法會金融服務界議員張華峰同工程界議員盧偉國（WK）尋日分別化身成財神同祿星，去美孚同大埔向居民派裝有朱古力金幣嘅利是。雖然財神衫已經比一般衫鬆身，不過對於體重有成二百磅嘅張華峰嚟講，件衫依然太細，搞到佢淨係扣到背脊最上面嘅一粒紐，仲被WK笑佢學人着deep V做脹爆財神。
爆梁美芬「甩底」
張華峰尋日一去到美孚，就匿埋喺架車度換衫換咗足足十五分鐘。點解要換咁耐？原來佢個肚腩「頂」住件財神衫，搞到後面啲紐扣極都扣唔埋，要就咁半披半着出來見人。WK乘機取笑張華峰學人着deep V，不過就係倒轉嘅deep V喎。
張華峰就大爆，梁美芬原本應承會扮「何仙姑」，不過尋日竟然臨時「甩底」唔見人。原來梁美芬早幾日去北京旅行，但前晚北京落大雪，結果搭唔切飛機返香港。
卓妮