中環出更：名人愛幫襯街頭小食
新年期間，深水埗「桂林夜市」及多區冒起小食檔，引起香港係咪需要街邊夜市嘅關注。尋日卓妮喺沙田馬場見到好多名人，大家講起小販檔，都有唔少回憶。仁愛堂副主席史顏景蓮（Kimmy）及丈夫史立德都鍾意食街邊嘢，仲話難忘年輕時拍拖食臭豆腐及燒賣嘅滋味喎！
史立德話，年輕時經常都會同太太去食豬雜、咖哩魚蛋及燒賣等街頭小食，仲遇過「走鬼」嘅驚險情況，因為啲小販車盛載滾油，混亂中佢拔足奔跑避開，笑稱要跑到好似捉賊咁快。Kimmy就話，唔止喺香港會食街邊小食，去到以夜市聞名嘅台灣及日本，亦都鍾意食街邊嘢。
冀檢討小販規管
立法會前秘書長馮載祥、太太馬潔嫻及兒子馮興禮都有入場，鍾意食街邊臭豆腐嘅馮興禮話，可以同食榴槤嘅太太「鬥臭」喎！雖然街邊小販係唔少人嘅童年回憶，不過喺香港已經買少見少。保良局總理陳正欣就話，香港舊有規管小販嘅政策已經過時，應該係要檢討吓，例如逢親新年等假日係咪可以彈性開放，雖然咁做可能對開業嘅食肆造成影響，但係有得就必有失。
仁濟醫院前主席嚴玉麟及太太嚴徐玉珊亦拍拖入場，問佢哋新年期間去邊度玩，點知佢哋就冇出外，點解？因為佢哋忙住同兩個月大嘅孫女玩囉！嚴徐玉珊話，恨抱孫恨咗咁耐，新年梗係要陪足全程，無論年宵、花市或夜市，都唔夠個孫女吸引力大。咁會唔會想抱多個孫？兩公婆即笑笑口話，要靠個仔努力先得。
卓妮