功夫茶日前踢爆香港淪為露宿者天堂，大家仲記唔記得邊啲地方係黑點呢？唔記得係正常嘅，事關周街都係流浪者，記都記唔到咁多喇。唔係講笑o架，「露宿者之家」遍布港九新界，梗有一間喺左近，香港就快變成流浪港咯。
呢，由於露宿者問題引起廣泛關注，本報再接再厲，巡查深水埗、油尖旺及北角等地區，發現到處都有露宿者聚集。好似深水埗昌新里嘅行人天橋咁吖，簡直係人頭湧湧，但唔係行人，而係露宿者。有居民憶述，晚上曾經見到有露宿者攞住菜刀踱嚟踱去，嚇到佢即刻離開，直言「以後都唔敢行呢條天橋」。又好似房協駿發花園一條隧道咁，有近二十名露宿者聚集，佢哋席地而睡，雜物散到一地都係，毛氈、衣服、個人物品乜都有，令人懷疑呢條唔係行人隧道，而係住人隧道。
最風涼水冷嘅莫過於港鐵南昌站通往連翔道嘅隧道，由於供車站內部互通，基本上只有深宵車站關閉後至有少數行人經過，露宿者以此為家，簡直就係靜中帶旺，交通便利。其實呢條隧道屬於港鐵範圍，露宿者居然可以大模廝樣長期佔領，你話係咪匪夷所思吖。
講到呢度，有人可能會問，點解露宿者咁鍾意居於天橋及隧道呢？嗱，呢個就要問港產官僚嘞，佢哋規劃失當，搞到好多天橋及隧道長期廢置，加上冇管理，卒之咪成為露宿者嘅天堂囉。就講昌新里行人天橋吖，本來係連接南昌邨嘅主要通道，但自從○一年天橋下方增設咗行人過路處，天橋就變得冷冷清清，行人稀疏，而相關部門又關人個關，任由荒廢，想唔烏煙瘴氣都幾難。最離譜嘅係，區議員多次向有關部門投訴，點知各部門互相交波，淨係將天橋斜路封咗就算，唔怪得有人話，港產官僚敷衍塞責，仲廢過啲廢橋同廢隧道喇！
講開又講，香港烏煙瘴氣，七國咁亂，何止係露宿者天堂，更加係庸官天堂。如果話民航處處長羅崇文將民航處總部變成「豪華娛樂城」，係「故意疏忽職守」，咁運輸署及食環署官僚坐視露宿者問題惡化，都算係「故意自取其辱」咯。香港枉稱國際都會，點知周街都係露宿者，反映官僚無能，呢個唔止係香港嘅悲哀，更加係港府嘅恥辱。
正所謂見微知著，堂堂政府連露宿者問題都解決唔到，仲話要「穩中求變、適度有為」，簡直係笑話。咪話功夫茶唔提醒吖，如果港產官僚繼續闊佬懶理，胡混度日，遲早連「門常開」都成為露宿者之家咋！