維園年宵尋日開市，唔少政黨都去擺檔。大部分泛民政黨都推出印有雨傘圖案嘅商品，擺明借佔領行動發新年財。其中公民黨一個雨傘造型嘅行李牌，兩星期前民陣遊行時賣三十八元，尋日竟然更坐地起價賣六十八元，加價近一倍，認真食水深。
社民連仲叻，做無本生意。社民連主席梁國雄話，今年出售嘅手繪布袋、黃傘、T恤及銅製雨傘吊飾，全部由熱心市民捐出，成本都唔使，其中手繪布袋竟要價一百八十元。
至於工黨就賣模仿警方警告旗幟嘅產品，上面寫「撤回人大決定，否則隨街鳩嗚」，成本十幾蚊但就賣成八十蚊。
而民主黨就有賣「抹走689」毛巾，以平日常見嘅「祝君安好」毛巾，印上特首梁振英（CY）嘅卡通圖案，兩條毛巾就賣六十八元九毫，認真掠水，唔知CY會唔會問民主黨追番啲分紅呢？