最近傳出政府懷疑介入香港大學法律學院前院長陳文敏或被委任做港大副校長嘅風波，令人不期然想起，十五年前因干預港大民意研究計劃總監鍾庭耀做民調而黯然下台嘅時任特首辦高級特別助理路祥安。咁啱路祥安尋日現身一個新書發布會，佢頗有耐心坐足兩個小時，留心聽講者發言。當佢想離去時，我哋趁機問佢如何評論港大風波，係咪覺得十幾年之後一樣有相同嘅事發生？路祥安聞言保持笑容，「哈」了三聲，舉起右手話「對唔住，我冇乜嘢講」，然後笑着離去。
