政情：楊偉雄等做無糧主席
立法會財務委員會今日料會開足八個鐘「馬拉松」會議，審議開設創新及科技局撥款。不過泛民主派事先張揚，會透過提出幾百項動議及不停提問題，務求令創科局「胎死腹中」。盛傳係創科局局長嘅理工大學副校長楊偉雄，早前已經向理大辭職，如果創科局真係難產，佢隨時變失業人士。不過，聽聞當局已諗到條橋，畀佢做住「無糧」主席先，以免悶親佢。
財委會月初開始討論創科局撥款，傾咗八個鐘都冇結果，今日係「最後一次」機會討論，事關若果唔及時通過，就趕唔切將開局開支列入新一年度財政預算案。聽聞政府打定輸數，一旦撥款真係不獲通過，商務及經濟發展局局長蘇錦樑、財經事務及庫務局局長陳家強亦將第一時間出嚟批評泛民拉布。
受訪笑而不語
不過，鬧還鬧，解決楊偉雄失業問題都好緊要。我哋收到風，近日政府將宣布將現時由財政司司長曾俊華做主席嘅創新及科技督導委員會，改組成類似金融發展局，直接向特首梁振英報告、權力較大嘅諮詢組織，而新任主席正係楊偉雄。但做呢啲委員會頂多只有車馬費，睇怕楊偉雄都要做住「無糧」主席先。楊偉雄尋日出席活動時，被問到辭職係咪「兩頭唔到岸」時就笑而不答。
泛民拉布飄忽
講起財委會，今個月廿七日仲有一次會議。政府消息人士話，會趁呢次會議處理一連串積壓嘅撥款申請，首個申請就係今個星期獲工務小組通過嘅基本工程儲備基金。因為政府講到明，如果唔能夠喺三月底通過，好多修橋補路工程都要暫緩。而漁農界關注嘅漁業發展基金，就要讓路排第二。政府亦會考慮分別喺廿七日及三至五月財委會嘅空窗期內加開會議。依家泛民拉布變得「無定向」，政府要如願以償，似乎就要多啲求神拜佛喇。