中環出更：專資會招兵最緊要夠「青」
年輕人議題成為社會熱話，唔少商會都話要年輕化。成員以年紀稍長嘅中層管理人員為主嘅香港專業及資深行政人員協會（專資會）都計劃招收青年會員，對象以正在投考專業資格嘅大學生為主。專資會創會會長容永祺（Samuel）鼓勵青年勿心急，先試大學本科以外行業，喺工作崗位「打好呢份工」，再靜待創業良機。
專資會早前舉行聯誼晚宴，唔少新進面孔蒲頭。Samuel分享創業心得，提醒青年人先做好打工仔，紮好根基，再諗做老闆，盲目創業只會撞板。
當局撲疫苗 史泰祖：嘥氣
專資會理事兼青委會副主席林力山就話，年輕化係該會未來方向，將主要招收正在投考專業資格嘅大學生，希望趁早發掘佢哋，培育上位。計劃將喺三月中嘅周年大會通過後付諸實行，大會亦同時選出新班子，現任會長盧偉國好大機會冧莊。
最近流感肆虐，搞到疫苗都唔夠打，政府急急搶購新疫苗，醫學會會長史泰祖就話「嘥氣」，直言疫苗四、五個月後才抵港，到時流感高峰期已過，乜流感菌都散晒，有針都無人想打，擔心會浪費公帑。同場嘅眼科醫生周伯展就關心「低頭一族」，慨嘆港人顧住打機、玩手機，眨眼太少造成嚴重眼乾，呼籲港人實行「三八制」，即八小時工作、八小時睡眠及八小時休閒作息。但現實係港人生活壓力大，睇怕想做都幾難。
卓妮