美食十里飄香，貨品琳琅滿目。嗱，咪以為功夫茶講緊台灣夜市同跳蚤市場吖，呢幕墟冚場面其實發生喺香港嘅行人天橋。
大家冇聽錯，旺角連接新世紀廣場往洗衣街方向嘅行人天橋每逢假日都被外傭攻陷，佢哋唔止佔據路面，仲公然無牌擺賣，搞到橋面窄上加窄，途人飽受滋擾。最離譜嘅係，有外傭見食得唔好嘥，居然將天橋當廚房，帶齊爐具及易燃氣體開檔，當街自製熟食販賣。本報記者現場發現，天橋一帶垃圾桶遺下大量垃圾，當中包括卡式石油氣樽，橋面亦有唔少食物殘渣，搞到烏煙瘴氣。
當局「縱傭」霸橋煮食，簡直係攞市民人身安全較飛。係人都知，當街明爐開火，唔止阻街及有損衞生，更加有危險性，尤其係使用卡式石油氣爐，萬一爆炸，隨時一鑊熟o架。再講吖，喺天橋開爐已經夠晒牙煙，乜嘢防火設備都冇，旁邊又堆滿雜物，人來人往，一旦火燒連環橋，後果真係不堪設想。
古人話，一室之不治，何以天下國家為。港府連一條天橋都管唔掂，唔怪得管到香港亂七八糟喇。正如立法會議員話齋，食環署作為執法部門，點能夠隻眼開隻眼閉，任由行人天橋變熟食市場o架。冇錯嘞，小販喺街邊擺賣都要領牌喇，外傭公然違法喺天橋販賣熟食，食環署官僚居然不聞不問，佢哋究竟有冇做好自己份工，畫公仔唔使畫出腸喇。呢，本報記者目擊有食環署職員巡經天橋時掂行掂過，對違規情況「熟」視無睹，唔知嘅話，仲以為佢哋係慕名而來搵食嘅顧客添。
講到呢度，真係令人懷疑本港行人天橋已經淪為當年嘅九龍城寨，成為三不管地帶。唔係咩，外傭大軍固然猖獗，露宿者更加肆無忌憚，唔止當天橋係廚房，直頭當天橋係豪宅，只要用木板同舊傢俬圍搭出一個私人空間，就可以大模廝樣周街露宿，搞到四周衞生惡劣，冤崩爛臭。點解堂堂國際都會淪為露宿天堂？咪多得港產官僚囉，執法者闊佬懶理，有法不依咯喎，露宿者仲唔有恃無恐，變本加厲咩！
一句講晒，行人天橋亂七八糟，就係今日香港烏煙瘴氣嘅寫照。如果港府真係失去管治意志，對一切霸佔行人天橋嘅違規行為關人個關，不妨直情開放天橋吖，香港無殼蝸牛愈來愈多，排隊上公屋嘅機會仲渺茫過中六合彩，好多人唔介意將天橋當住宅o架，唔止有瓦遮頭，仲有食環署官僚巡邏保安全，諗落都唔錯o架。