政情：公民講場：西九難撈「連」佢都走

西九文化區行政總裁呢個職位，可以稱得上係「三煞位」，個個做到中途離任。繼當年首任行政總裁謝卓飛上任不足半年後，即刻以「思鄉」等健康理由請辭，估唔到頂替佢嘅連納智，做咗三年半後又再突然辭職。連納智尋日自稱一度中風，又話太太病重，所以要花多啲時間陪太太喎。依家佢搬埋屋企人出來，照計就唔應該再被懷疑，但既然咁緊急，點解唔即時辭職唔撈，而要延遲到八月先走人？加上佢當年上任時，記者問佢會否因為健康理由請辭，佢曾經豪言壯語話「最差情況係死」，總之點都唔會走，點知依家話走就走。