政情：林鄭譚志源 民望創新低
政府政改三人組起初推銷政改係威係勢，但經過佔領行動後，依家通過政改更見艱難，連帶政務司司長林鄭月娥同政制及內地事務局局長譚志源（Raymond）嘅民望都插水式大跌。港大最新民意調查顯示，林鄭同Raymond嘅支持率淨值都創咗兩人上任以來嘅新低，但反而較少露面嘅律政司司袁國強評分就有所上升喎。調查結果係咪反映官員少啲露面會好啲呢？
譚志源：當然比較傷心
佔領行動結束後，本港政圈焦點再次落喺政改身上，尤其係林鄭同Raymond就經常行孖咇出席唔同政黨團體嘅政改研討會及論壇，如果講曝光率，二人肯定係眾官員之首。不過，曝光率高唔代表受市民歡迎，根據港大民意研究計劃喺一月底至二月初進行新一輪高官民調，結果發現林鄭同Raymond嘅民望不約而同下跌，更創出新低。
其中林鄭嘅民望由去年十月開始逐步下挫，最新民調顯示佢評分再跌零點六分，支持率淨值又跌兩個百分點，無論係評分定支持率淨值，都跌至佢做政務司司長以來嘅歷史新低點。至於Raymond仲大鑊，支持率淨值暴跌十一個百分點，係眾官員中跌幅最大嘅一位，同時亦破咗佢自己嘅民望新低。
尋日Raymond出席鄉議局會議時，就被問到點睇自己民望大插水，佢只能話「當然比較傷心」，亦理解市民對政改通過唔樂觀，所以將不滿同失望情緒投射到主理政改嘅官員身上。其實Raymond嘅推銷手法尚算圓滑，連泛民主派都好少向佢開火，但支持度仍然大跌，睇嚟佢可能要改變一下策略。
袁國強少發言 民望反升
反而政改三人組之中嘅袁國強，由於佢較少就政改議題發言，民調顯示佢民望不跌反升，再次印證官場中「少做少錯」嘅哀歌。不過，又唔可以「一竹篙打一船人」，好似食物及衞生局局長高永文咁，經常曝光講流感，支持率淨值升咗六個百分點喇。莫非高永文個樣睇落夠可憐，市民畀咗同情分？