中環出更：政改畀意見 鄉紳有貓紙
政改三人組官員尋日踩入沙田鄉議局向鄉親父老推銷政改「袋住先」，但鄉議局秘書處唔知係咪驚鄉紳講錯嘢，特別向佢哋提供疑似「貓紙」嘅參考資料，教佢哋提問兼提建議。事實上，秘書處實在太睇小鄉紳嘅辯才，鄉紳不但即場「爆肚」，仲金句多多添！
即場「爆肚」言論精彩
保安局去年疑似同民建聯打龍通，教議員問問題惹風波，鄉議局貓紙亦列出十幾條意見同提問，部分建議都算破格，好似建議「提名委員會可採用不記名方式投票產生特首候選人」，認為「有利於提委會成員免受脅迫、利誘、情感等因素干擾，也不必擔心打擊報復」喎。
其實鄉紳雄辯滔滔，唔使貓紙都出口成文，屏山鄉事委員會主席曾樹和嘲諷民主國家「係咪唔使坐飛機，直接上月球？」質疑點解一定要爭取民主，建議政府直接跟隨人大八三一決定，「攞三個福祿壽（候選人）出嚟」就得，但強調只代表個人意見。上水鄉委會主席侯志強更豪言，用人頭擔保鄉議局支持人大決定！鄉紳言論仲精彩過貓紙，送畀其他黨用好過！
卓妮