政情：「紅底」葉璐珊性感照瘋傳
香港大學學生會尋日開始舉行一連五日選舉，選出新一屆學生會中央幹事會內閣、學生會官方刊物《學苑》編輯委員會及評議員，以及公投應否退出學聯。其中一個候選內閣「Smarties」嘅候選康樂秘書、本身係內地生嘅葉璐珊，繼早前被揭係內地共青團成員等「紅底」背景後，近日再有網友發現佢去年曾為內地攝影雜誌拍攝一批尺度大膽嘅火辣性感照，而該批照片亦喺網絡瘋傳。
內地攝影師：絕非意淫
自稱負責拍攝該輯性感照片嘅內地攝影師江演媚，喺社交網站為葉璐珊護航，指該輯照片題目為《遊園驚了誰的夢》，內容講述由少女走向成熟、轉變角色嘅困惑，希望帶出女性內心充滿迷惘、喜悅、未知等複雜情感，絕非意淫。江演媚又強調，拍攝期間全部工作人員均為女性，批評有網民喺相片加上猥褻文字，歪曲其作品原意，故再於網絡發布原照，以正視聽。
講番今次學生會選舉，尋日開放八個票站供學生投票。有學生質疑，學生會退出學聯係分裂學運力量；亦有學生認為退出學聯係表明立場，象徵與學聯劃清界線，又指學聯喺雨傘運動阻慢升級進度，與港大學生會理念不符。