俗語話「好佬怕爛佬，爛佬怕潑婦」。老實講，巴辣又鍾意鬧人嘅女仔的確係幾難頂，之不過，如果呢個女仔又靚又好身材，相信畀佢鬧同見到佢發嬲，對於好多男人嚟講並不難受，甚至係一種享受。想好好體驗呢種享受？搵吉木莉莎呢位日本水着界天后級索女就啱喇！
想同身邊嘅朋友溝通，講說話就最直截了當，不過有時要表達心中所想以及情感，一個眼神又或者一個動作卻又勝過千言萬語。最簡單就係落酒吧溝女，見到身邊嘅女仔向你單眼，玉手輕輕勾搭你強壯臂彎，唔使多講都知今晚一定有着落，即使未至於去九龍塘，至少都可以博得一個送佢返歸，贏個香吻嘅機會啦。而日本水着天后吉木莉莎就擁有一套能夠說話嘅身體語言喇。現年27歲嘅阿妹美艷迷人，嬌艷不可方物，神采十足嘅眼神加上櫻桃小嘴，成日嘴角含春咁款，唔需要說話都能夠迷死男人，呢一副被評為符合人類黃金比例嘅面孔果然了得。此外，能夠說話嘅仲有一副姣好身段，稱其為姣好認真冇錯，因為玲瓏浮凸嘅莉莎擅長將身體扭動出充滿誘惑味嘅姿態，散發出一股令男人難以抗拒嘅姣味，真係要佩服為佢拍寫真嘅攝影師可以頂得住如此誘惑。
吉木莉莎出道初期都經歷唔少波折，一心諗住加入早安少女組發展，點知喺選拔賽中落選；以水着女優身份拍寫真，又遭到父母反對，幸好莉莎能夠堅持落去，終於成功闖出名堂，家陣已經成為水着界天后，更加喺藝能圈穩佔一席位，甚至往歌、影、視三棲發展添。莉莎人氣火速上升，美貌同身段固然係功不可沒，但最重要都係上電視台各個綜藝節目演出嘅時候唔怕蝕底，要佢走光就走光，要佢搞笑就扮到好似傻妹咁，種種演出都能夠取悅觀眾。不過，近期莉莎就冇咁好相與喇，因為電視台安排咗個節目《想被吉木莉莎發怒》畀阿妹擔綱演出，由莉莎對住鏡頭就各種芝麻綠豆小事發嬲喪鬧，鬧人冇骨氣、冇出色等等，不過節目又出奇地受歡迎噃，因為日本男人好多都有被虐傾向，仲好鍾意畀靚女鬧添。其實小弟我都係，唔該吉木莉莎你快啲鬧我兩句啦！
吉木莉莎知名度同人氣強勁，事務所特別為佢設立個人專屬網頁，入面會公布莉莎嘅最新消息以及演出片段，想知道莉莎近期有乜演出就要上去睇喇。
網址：http://columbia.jp/yoshikirisa/
年齡：27歲
身高：5呎4吋
三圍：32D-23-34
撰文：賢