政情：中環出更：郭偉強婚宴 大舅催「造人」
工聯會立法會議員郭偉強尋日小登科擺酒，迎娶拍拖三年嘅女友姚影霞（Myolie），正式結束王老五生涯。Myolie喺致詞時話想當年識咗郭偉強無耐，郭偉強就話要選立法會，搞到佢連想見男朋友一面都要預約。正當郭偉強想開聲安撫太太時，黨友兼司儀麥美娟（Alice）就搶答話：「依家唔使啦，佢成個人都係你o架喇！」
Myolie哥哥係元朗區議員姚國威，郭偉強話佢同姚國威係多年老友，但經過尋晚後，姚國威就變咗佢嘅大舅，兩人就親上加親。姚國威就乘機叫兩人追番個羊Ｂ，因立會通過咗三日男士有薪侍產假。不過，勞工及福利局長張建宗就話，由於兩人都係自僱人士，按法例唔可以享有有薪侍產假喇。
麥美娟討「媒人利是」
郭偉強喺簽結婚證書時話，平時簽文件就簽得多，唔知點解簽結婚證書就咁緊張。Alice就插口話，想當日自己都有份見證兩人相識，叫郭偉強要封「媒人利是」畀佢喎。計卓妮話，郭偉強應該介紹啲男仔畀Alice認識會實際啲囉。
卓妮