怪事年年有，最近特別多。反對派為阻撓港府施政，喺立法會發起全面不合作運動，已到咗走火入魔嘅地步，曾試過一日之內針對唔同議題三度拉布，令人忍無可忍。正如「東方報業民意調查」顯示，多數受訪者批評反對派罔顧民生，為玩嘢而玩嘢，遲早票債票償。
講到不合作運動，反對派為拉布而拉布，連民生議題都唔放過，簡直匪夷所思。好似成立創新及科技局咁吖，拉布拉足半年，搞到連情人節都要加開會議，建制派話就話不惜通宵開會，奉陪到底啫，弊在反對派無所不用其極，最終可唔可以過關，真係令人懷疑。商務及經濟發展局局長蘇錦樑話齋，反對派拉布每寸價錢都係由市民付出。
係人都知，家陣係科技年代，發展創新科技係大勢所趨，香港喺呢方面早就落後於人，再唔急起直追，遲早連食塵都唔得，偏偏反對派政治掛帥，一味阻住地球轉。「東方報業民意調查」顯示，三成六受訪者認為拉布已經失控，變成對人不對事；三成一人批評政客無視民意，不顧民生；兩成三直斥反對派為鬥爭亂拉布。
其實，反對派嘅所謂不合作運動，根本係雙重標準，對佢哋有利嘅，唔止唔反對，仲好合作添。呢，早前立法會急急通過每周三大會提早兩小時結束嘅動議，政客既冇拉布，更冇流會；至於每次講到加薪咯喎，佢哋更加唔會執輸。反觀其他民生議題，佢哋就關人個關，百般阻撓，搞到立法會幾乎癱瘓，復會四個月以來，一項新嘅工程撥款都未通過，財委會處理嘅全部係上個立法年度積壓嘅工程，問你服未！
小數怕長計，喺反對派拉布之下，過去一年立法會淨係響鐘點算法定人數已經虛耗七十小時，浪費公帑逾千萬元，工程成本更因拉布而激增二十幾億元，有人話拉布嘅每一寸都係市民畀錢，一啲冇講錯o架。唔怪得四成二受訪者認為議員應該減人工；兩成三人批評議員表現與人工成反比；兩成二人更加直斥縮骨，只識自肥。
最無恥嘅係，反對派一方面拉布阻住地球轉，一方面收取淫賤黎政治黑金，而且公然喺立法會替佢發聲，完全唔顧利益衝突嘅嫌疑，面皮仲厚過牛皮。正如多數受訪者指出，反對派政客同淫賤黎狼狽為奸，唔止令立法會烏煙瘴氣，仲搞到成個香港七國咁亂。
始終都係呢句，多行不義必自斃。反對派有破壞冇建設，阻政改玩拉布，策動違法佔中，收取政治黑金，全部與民為敵，必定會自作自受，明年立法會選舉，就係佢哋現眼報嘅時候喇！