政情：沈祖堯助建橋 差啲幫倒忙
「無止橋慈善基金」尋日舉行第四屆無止行慈善步行籌款，中文大學校長沈祖堯，環境局局長兼無止橋榮譽顧問黃錦星（星星）齊齊以一身運動裝現身，其中沈祖堯自爆兩年前到甘肅，落手落腳為當地居民建橋時差啲幫倒忙。
星星「落水」支持
話說當時撞正下雨，建橋時要經常「落水」，沈祖堯有次睇見幾位中大學生喺度搬木，便走上前幫手，唔知係咪學生太過信賴佢嘅關係，竟然立即放手畀佢去搬，誰知該木頭非常重，差啲將整個木頭丟掉。星星則憶述當地獨木橋好簡陋，有次企喺橋上時唔小心跌落水，不過佢轉頭見好多當地村民跌落水係家常便飯，所以都實行「落水」支持活動。
講番今次步行籌款活動，無止橋發起人紀文鳳透露今年籌到七十萬元，將用於建設及營運甘肅省嘅村民活動中心，並向村民示範並推廣建設抗震環保嘅現代夯土建築。