政情：陳岳鵬「官場」「政界」旋轉門
政制及內地事務局政治助理陳岳鵬（Ronald）一度係新民黨主席葉劉淑儀愛將，不過佢喺四年前突然辭去南區區議員身份，走入官場做特首辦特別助理，現任政府於一二年七月上場後就出任政制局政治助理，前途似乎無可限量，不過近日有消息傳出二○一六年有重大決定，就係當政改方案大局已定，將會棄官從政還葉太人情，代表新民黨於香港島地區直選排名第一，盛傳下屆唔選嘅葉太就排第二「抬轎」撐對方入局，Ronald呢個官場、政界「旋轉門」會否成真，相信好快就會有端倪。
獲「抬轎」排首名參選
Ronald於一○年有區議員唔做，轉換跑道至官場，加上之後陸續有葉太嘅左右手先後加入官場，令匯賢智庫、新民黨一度被冠以「官職直升機」嘅稱號，不過有得必有失，Ronald當年根據地薄扶林選區一去無回頭，無論係一○年補選同一一年區議會選舉都未能收復失地，自此傳出葉太同Ronald一度不咬弦。
回覆話傳聞「咁好笑」
不過世事無絕對，葉太覬覦一七年特首寶座已係政圈公開秘密，有傳佢有意於下屆立法會選舉排第二，力捧心儀人選上位，據聞其中一個方案係搵Ronald回歸排第一。
有分析指，Ronald當年唔做區議員加入政府，一直覺得欠葉太一個人情，因此只要葉太出聲要求，料Ronald唔會托手（月爭），大有機會強勢回歸政圈，甚至「升呢」為尊貴立法會議員。
不過，Ronald接受查詢時首先以「咁好笑」來形容呢個傳聞，強調呢個講法係第一次聽，自己從來無同葉太講過選舉嘅嘢，現階段想做好政改工作，暫時無意離開現屆政府。不過據聞葉太心目中有數個潛在目標人選，如果Ronald現階段未肯露口風，又會否有其他人搶佔先機呢？
除咗葉太疑似有意排第二「抬轎」，一早表明一六年立法會選舉棄選嘅立法會主席曾鈺成，亦唔介意幫人「抬轎」，可能會喺名單排第二，力保盛傳會參加立法會選舉嘅民建聯副主席張國鈞，睇嚟呢場選戰將會好戲連場。