政情：中環出更：郭國全暗批泛民拖慢港工程
泛民主派突襲負責審批基建工程嘅立法會工務小組，成功奪得工務小組主導權，加上於議會發起不合作運動拉布，令多個政府工程項目撥款議案被抽起，前政府經濟顧問郭國全尋日於電台節目上暗批泛民，擔心本港嘅政治爭拗，令到一啲本來應該通過嘅基建工程或法例無法落實，蠶食本港競爭力。佢又特別提到，近年全球流行「創業精神」，就係遇到社會問題時唔好投訴，而係要設法解決喎。
預計樓價逐步回落
郭國全其後講到中港矛盾問題，認為雖然內地存在唔少問題，不過香港人可以視之為機會，例如內地污染問題，造就咗唔少香港公司喺內地提供服務，至於香港樓價同租金高企問題，郭國全相信，樓市始終有周期，預計政府只要維持土地房屋供應，樓價會逐步回落。
其實郭國全非第一人暗批泛民不應拉布拖垮議會進度，事關財經事務及庫務局局長陳家強早前亦喺立法會批評泛民拉布，除咗令部分具爭議性嘅項目唔能夠通過，亦導致其他無爭議性嘅議程不斷積壓，依家郭國全、陳家強等人都苦口婆心向泛民規勸，唔知泛民幾時回頭是岸呢？
卓妮