本港基建工程甩漏多多，問題叢生，特別係延誤超支，更加係家常便飯，市民早已見怪不怪。勢估唔到嘅係，家陣居然發展到「未動工，先超支」，真係唔到你唔服。
話說立法會尋日討論啟德體育園區最新進展，民政事務局話喎，受內外因素影響，項目將會延誤九個月，預計要到年中立法會工務小組及財委會通過撥款後，下半年至可以展開前期工程。唔使問阿貴，工程滯後，造價梗係水漲船高啦，當局最新估價係二百五十億元，足足比原本估算嘅一百八十億元多一大橛。你知喇，家陣反對派政客阻撓施政無所不用其極，工程可唔可以如期獲得撥款，實在令人懷疑，萬一好似創科局咁受到阻滯，最後埋單計數可能遠遠唔止二百五十億元o架。
話時話，今時今日港府拖拉成風，基建延誤超支已唔係新聞，準時落成先至係新聞。呢，港珠澳大橋、西九文化區、高鐵呢類大型項目固然不在話下，連原本計劃同非政府機構合作興建嘅青年宿舍，同樣一拖再拖，其中上環項目更要拖到一八年至落成。所以話啫，旨意港產官僚解決房屋問題，為青年人提供安居之所，真係蚊都瞓蛇都死。
講番啟德體育園，其實體育界人士早喺十年前已提出，期間一度傳出政府有意將園區改建房屋，引發體育界強烈反彈，當局先至唔敢亂嚟。最離譜嘅係，項目十畫未有一撇，淨係委聘營運顧問已涉及四千萬元，納稅人未見官先打三十大板，簡直係冤哉枉也。
本來呢，遲到好過冇到，興建體育園係體育界嘅心願，亦係港府嘅承諾，最怕當局經營管理不善，最終淪為大白象，咁就弄巧反拙喇。係人都知，本港體育運動唔算普及，呢類大型體育設施符唔符合成本效益，實在令人懷疑。例如紅館咁，如果唔係租畀人開演唱會，怕且早就執笠咯。又例如耗資十一億元嘅將軍澳單車館，話就話係畀專業運動員集訓同比賽嘅，結果使用率不足兩成，加上當局對工程無監無管，驗收求求其其，結果開張半年就要封館三個月進行「優化工程」，四百幾萬元費用又係納稅人埋單。唉，基建工程唔係超支就係得物無所用，呢度浪費幾十億，嗰度唔見幾百億，識印銀紙都唔掂啦。
始終都係嗰句，港產官僚食嘢唔做嘢，做嘢打爛嘢，興建體育園究竟係好事定係壞事，根本冇人知。正如有人話齋，與其好大喜功，不如集中精力解決民生問題好過啦！