民主黨（白鴿黨）將會喺本月二十七日舉行黨慶晚會，亦已向官員發出邀請。不過，有消息就話，因為白鴿黨同政府撐到行，該黨「AV仁」何俊仁又聲言要發動辭職公投，加上黨慶晚會有籌款成分，官員身份出席會好尷尬，所以好多官員都唔會出席該黨黨慶。白鴿黨呢頭喺議會搞不合作運動，嗰頭又請官員去黨慶，真係自相矛盾，被人拒絕都係自取其辱喇！
卿姐承認已向官員發出邀請，除咗運輸及房屋局局長張炳良、食物及衞生局局長高永文話會出席外，大部分都未回覆，佢會尊重官員嘅決定，但當局係咪要同該黨「全面搞對抗」、「過唔去」嘅話，當局自己選擇喎。其實該黨原定去年十月舉行黨慶，但因為泛民主派要瞓身搞佔領行動先至擱置咗。即使依家再搞番，又撞正新正頭，似春茗聯歡多個黨慶囉，籌錢更加唔敢奢望喇。
另外，白鴿黨葵青區議員周奕希上月就提交咗退黨申請，佢就話因為想轉個身份。但有消息就話，其實係因為佢做咗肇慶市政協。根據肇慶市人民政府網站上月公布，確係有一位增補政協委員叫「周奕希」，但因為聯絡唔到周奕希，所以就無法證實消息真偽。