政情：借「提」發揮 議員嘲葉劉
曾任保安局局長嘅行政會議成員兼立法會議員葉劉淑儀，前日自爆早前因為誤信欺詐電郵，被黑客盜用銀行戶口密碼，竊取咗六萬五千元美金（約五十萬港元）。雖然葉太已經成功攞番筆錢，但就被班議員同事「抽水」取笑，民主黨（白鴿黨）議員單仲偕就力數葉太「四宗罪」；議員田北俊（田少）更諷刺葉太「仲話做特首喎？」就連商界林健鋒都踩埋一份，真係「牛鬼蛇神」出晒嚟。
單仲偕力數「四錯處」
曾經做過資訊科技界議員嘅單仲偕話，葉太今次至少有四個錯處，首先係收到不明來歷嘅電郵已經唔應該打開；第二係見到不明來歷嘅網址就唔應該開，更加唔應該輸入自己啲密碼；第三係收到警告電郵就應該立即剷晒電腦啲資料；最後就係要改晒所有敏感嘅密碼喇。單仲偕仲寸爆話︰「要喺銀行攞錢唔易o架，所以佢（葉太）嘅錯真係唔易犯。」單仲偕講得咁口響，唔知佢試過中招未呢？
經過嘅田少見到單仲偕講到興致勃勃，亦都忍唔住插嘴話，遲啲白鴿黨黨慶要送部唔會咁易被人偷到資料嘅電腦畀佢哋，又話自己「好水」，見到呢類電郵都唔夠膽亂咁，如果事件發生喺自己身上一定唔會講出來畀人笑喎，仲揶揄葉太︰「仲話做特首喎？」與葉太同樣係行會成員兼立法會議員嘅林健鋒亦都加把口「潤」葉太，話自己唔會用電郵匯錢，又強調佢處理行會文件係「一手交一手」，好安全咁話。
「已成功攞番啲錢」
不過，葉太今次係以受害人身份做咗新聞封面人物，大家真係唔恨得咁多，唔通靠抽水、貪腐醜聞、辭職、被褫奪公務或選舉落敗等見報先至馨香咩！葉太尋日就喺社交網話，已經成功攞番啲錢，又解釋因為自己要參與嘅會議繁多，好多電話都未能接聽，銀行職員聯絡唔到佢，先發生呢件事。佢仲話，工作太忙而未能及時處理私務係導致事件發生嘅原因之一，但佢唔會因為咁而唔再幫襯間銀行喎。